ಉಡುಪಿ:ಪರ್ಯಾಯ ಪುತ್ತಿಗೆ ಮಠದ ಆಶ್ರಯದಲ್ಲಿ ಶ್ರೀ ಕೃಷ್ಣಮಠದಲ್ಲಿ ನಡೆಯುತ್ತಿರುವ ಬೃಹತ್ ಗೀತೋತ್ಸವದ ಅಂಗವಾಗಿ ನವೆಂಬರ್ ೨೮ರಂದು ಜರುಗಲಿರುವ ಲಕ್ಷಕಂಠ ಗೀತಾ ಪಾರಾಯಣ ಕಾರ್ಯಕ್ರಮದಲ್ಲಿ ಭಾರತದ ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಭಾಗವಹಿಸಲಿದ್ದಾರೆ. ಇದೇ ಸಂದರ್ಭದಲ್ಲಿ ಸ್ವರ್ಣ ತೀರ್ಥ ಮಂಟಪ ಮತ್ತು ಕನಕನ ಕಿಂಡಿಗೆ ತಯಾರಿಸಿರುವ ‘ಕನಕ ಕವಚ’ ವನ್ನು ಲೋಕಾರ್ಪಣೆಗೊಳಿಸಲು ಮಠದಲ್ಲಿ ಸಕಲ ಸಿದ್ಧತೆಗಳು ಮುಂದುವರಿದಿವೆ.ಕನಕ ದಾಸರ ಅಧ್ಯಾತ್ಮಿಕ ಪರಂಪರೆಯನ್ನು ಪ್ರತಿಬಿಂಬಿಸುವ ಈ ವಿಶಿಷ್ಟ ಕನಕ ಕವಚವನ್ನು ಮಾಜಿ ಸಚಿವ ಪ್ರಮೋದ್ ಮಧ್ವರಾಜ್ ಅವರು ಸೇವಾರೂಪದಲ್ಲಿ ಭಕ್ತಿಭಾವಪೂರ್ವಕವಾಗಿ ಅರ್ಪಿಸಿದ್ದಾರೆ.
“ಫಲಾಪೇಕ್ಷೆಯಿಲ್ಲದ ಸೇವೆ” ಪ್ರಮೋದ್ ಮಧ್ವರಾಜ್ ಪೂಜೆ ಬಳಿಕ ಮಾತನಾಡಿದ ಪ್ರಮೋದ್ ಮಧ್ವರಾಜ್ ಅವರು,“ಪರ್ಯಾಯ ಪುತ್ತಿಗೆ ಶ್ರೀಪಾದರಾದ ಸುಗುಣೇಂದ್ರ ತೀರ್ಥರು ಕನಕನ ಕಿಂಡಿಗೆ ಕನಕ ಕವಚ ಮಾಡುವ ವಿಚಾರ ತಿಳಿಸಿದಾಗ ತಕ್ಷಣವೇ ಒಪ್ಪಿಕೊಂಡೆ. ಯಾವುದೇ ಫಲಾಪೇಕ್ಷೆಯಿಲ್ಲದೆ, ಶ್ರೀ ಕೃಷ್ಣ ಮತ್ತು ಕನಕದಾಸರಿಗೆ ಭಕ್ತಿಯಿಂದ ಈ ಕವಚವನ್ನು ಸೇವೆಯ ರೂಪದಲ್ಲಿ ನೀಡುತ್ತಿದ್ದೇನೆ,” ಎಂದು ಹೇಳಿದ್ದಾರೆ.
ಗುರುಪುರ,ಕೈಕಂಬ ಗುರುಪುರ ಕೈಕಂಬದ ವಿವೇಕ್ ಆರ್. ಪ್ರಭು ಅವರ ಮಾಲಕತ್ವದ ಶ್ರೀ ದಾಮೋದರ ಜ್ಯುವೆಲ್ಲರ್ಸ್ ಸಂಸ್ಥೆ ವಿಶೇಷವಾಗಿ ನಿರ್ಮಿಸಿದ ಆಕರ್ಷಕ ಕನಕ ಕವಚವನ್ನು ಪ್ರಮುಖ ಸಮಾಜಸೇವಕ ಪ್ರಮೋದ್ ಮಧ್ವರಾಜ್ ಅವರಿಗೆ ಹಸ್ತಾಂತರಿಸಿದೆ.ಕವಚದಲ್ಲಿ ಶ್ರೀಕೃಷ್ಣ ಮತ್ತು ಕನಕದಾಸರ ಸುಂದರ ಕೆತ್ತನೆಗಳು ಇರಲೆಂದೇ ನಿಖರವಾದ ಕಲಾತ್ಮಕ ಕೌಶಲ್ಯ ಬಳಸಲಾಗಿದ್ದು, ಇದು ಎಲ್ಲರ ಗಮನ ಸೆಳೆಯುವಂತಾಗಿದೆ. ಶಿಲ್ಪಕಲೆಯ ನವೀನ ಮಿಶ್ರಣ ಮತ್ತು ಸಂಸ್ಕೃತಿಯ ಸೊಬಗು ಈ ಕವಚದ ವೈಶಿಷ್ಟ್ಯವಾಗಿದೆ.ಶೀಘ್ರದಲ್ಲೇ ಕುರುಬ ಸಂಘದ ಪ್ರತಿನಿಧಿಗಳೊಂದಿಗೆ ಪ್ರಮೋದ್ ಮಧ್ವರಾಜ್ ಅವರು ಈ ಕವಚವನ್ನು ಶ್ರೀ ಕೃಷ್ಣ ಮಠಕ್ಕೆ ಅಧಿಕೃತವಾಗಿ ಹಸ್ತಾಂತರಿಸುವರು ಎಂದು ತಿಳಿಸಲಾಗಿದೆ.
ಗೋಶಾಲೆಯಲ್ಲಿ ವಿಶೇಷ ಪೂಜೆ ನವೆಂಬರ್ ೨೧ ರಂದು ಉಡುಪಿ ಅಮ್ಮುಂಜೆಯಲ್ಲಿರುವ ಮಧ್ವರಾಜ್ ಅವರ ನಿವಾಸದ ಗೋಶಾಲೆಯಲ್ಲಿ ಈ ಸ್ವರ್ಣಮಯ ಅತ್ಯಾಕರ್ಷಕ ಕವಚಕ್ಕೆ ವಿಧಿವಿಧಾನಗಳೊಂದಿಗೆ ವಿಶೇಷ ಪೂಜೆ ನೆರವೇರಿತು.ಈ ಸಂದರ್ಭದಲ್ಲಿ ಉಡುಪಿ ಜಿಲ್ಲಾ ಕುರುಬ ಸಂಘದ ಪದಾಧಿಕಾರಿಗಳು ಉಪಸ್ಥಿತರಿದ್ದರು.